मुख्य कुरा
- स्थानीय तहको निर्वाचनका लागि आयोगले आन्तरिक तयारी अघि बढाइरहेको छ।
- निर्वाचनको मिति सरकारले आयोगसँगको परामर्शमा घोषणा गर्नेछ।
- वैशाखमा स्थानीय तहका पदाधिकारीको कार्यकाल सकिँदैछ।
- प्रदेश र स्थानीय तहको निर्वाचन एकैसाथ हुने टुंगो नरहेको कार्कीले बताए।
काठमाडौं । प्रमुख निर्वाचन आयुक्त मानबहादुर कार्कीले आगामी स्थानीय तहको निर्वाचनका लागि निर्वाचन आयोगले आन्तरिक तयारी अघि बढाइरहेको बताएका छन्।
राष्ट्रिय समाचार समिति (रासस) का प्रतिनिधिसँग निर्वाचन आयोगमा भएको छलफलमा कार्कीले निर्वाचनको मिति सरकारले आयोगसँगको परामर्शमा घोषणा गर्ने भएकाले अहिले नै मिति तोक्ने अवस्था नरहेको स्पष्ट पारे।
उनले स्थानीय तहलाई लामो समयसम्म जनप्रतिनिधिविहीन राख्न नहुने धारणा राख्दै आगामी वैशाखमा स्थानीय तहका पदाधिकारीको कार्यकाल सकिने संवैधानिक व्यवस्थालाई ध्यानमा राखेर निर्वाचनको तयारी भइरहेको बताए।
निष्पक्ष र विवादरहित निर्वाचन सम्पन्न गर्नु आयोगको प्रमुख दायित्व हो ।
प्रमुख निर्वाचन आयुक्त मानबहादुर कार्की
स्थानीय तह र प्रदेशको निर्वाचन एकैपटक गर्ने तयारी भइरहेको हो कि भन्ने प्रश्नमा प्रमुख निर्वाचन आयुक्त कार्कीले संवैधानिक तथा कानुनी व्यवस्थाअनुसार निर्वाचन हुने भन्दै प्रदेश र स्थानीय तहको निर्वाचन एकैसाथ हुन्छ भनेर अहिले नै भन्न नसकिने स्पष्ट पारे ।
उनका अनुसार सरकारले निर्वाचनको मिति घोषणा गरेपछि आयोगले सोहीअनुसार निर्वाचन सम्पन्न गर्ने तयारी गर्नेछ। निष्पक्ष र विवादरहित निर्वाचन सम्पन्न गर्नु आयोगको प्रमुख दायित्व रहेको पनि उनले बताए ।
कार्कीले आगामी निर्वाचनमा पनि रासससँग सहकार्य गर्न आयोग तयार रहेको उल्लेख गरे। छलफलमा निर्वाचन आयुक्तहरू सगुन शमशेर जबरा र गुरुप्रसाद वाग्लेसहित आयोग तथा राससका प्रतिनिधिहरूको सहभागिता रहेको थियो। रासस




प्रतिक्रिया