मुख्य कुरा
- बंगालको खाडीमा विकसित न्यून चापीय प्रणाली सोमबारसम्म चक्रवाती आँधीमा परिणत हुन सक्ने जल तथा मौसम विज्ञान विभागको अनुमान छ।
- अक्टोबर २८ देखि नोभेम्बर १ सम्म नेपालका विभिन्न क्षेत्रमा भारी वर्षा र हिमपातको जोखिम रहेको पूर्वानुमान छ।
- एक साताभित्र कुल वर्षा २०० मिलिमिटरभन्दा बढी हुन सक्ने सम्भावना छ।
- कृषि तथा पर्यटन क्षेत्रमा असर पर्न सक्ने चिन्ता व्यक्त गरिएको छ।
- मौसमविद् विनोद पोखरेलले सन् २०१४ को अन्नपूर्ण हिमआँधीसँग अहिलेको मौसमी अवस्थाको केही समानता रहेको बताएका छन्।
झापा । बंगालको खाडीमा विकसित भइरहेको न्यून चापीय प्रणाली चक्रवाती आँधीमा परिणत हुने सम्भावनासँगै आगामी साता नेपालका विभिन्न क्षेत्रमा भारी वर्षा र हिमपातको जोखिम बढ्ने पूर्वानुमान गरिएको छ। मौसमविद्हरूका अनुसार केही स्थानमा एक साताभित्र कुल वर्षा २०० मिलिमिटरभन्दा बढी हुन सक्ने सम्भावना छ।
पूर्वानुमानमा उल्लेख गरिएको २०० मिलिमिटरभन्दा बढी वर्षा एकै दिनमा नभई उक्त अवधिको कुल वर्षा हो।
विनोद पोखरेल
मौसमविद् विनोद पोखरेलका अनुसार आगामी बुधबारदेखि आइतबारसम्मको अवधिमा वर्षाको प्रभाव देखिन सक्नेछ। यद्यपि, वर्षाको वास्तविक मात्रा, समय र प्रभावित क्षेत्रबारे अहिले नै निश्चित निष्कर्ष निकाल्न नसकिने उनले बताएका छन्। पूर्वानुमानमा उल्लेख गरिएको २०० मिलिमिटरभन्दा बढी वर्षा एकै दिनमा नभई उक्त अवधिको कुल वर्षा हो।
जल तथा मौसम विज्ञान विभागका अनुसार शुक्रबार बिहान बंगालको खाडीको पूर्वमध्य भाग तथा आसपासको दक्षिणपूर्वी क्षेत्रमा न्यून चापीय प्रणाली विकास भएको छ। उक्त प्रणाली शक्तिशाली बन्दै सोमबारसम्म चक्रवाती आँधीमा परिणत हुन सक्ने अनुमान छ। त्यसपछि यो पश्चिम–उत्तरपश्चिम दिशातर्फ अघि बढ्दै भारतको उत्तरी आन्ध्र प्रदेश र दक्षिणी ओडिशाको तटीय क्षेत्रमा प्रवेश गर्ने सम्भावना रहेको विभागले जनाएको छ।
यस प्रणालीको प्रभाव आगामी बुधबार, अक्टोबर २८ देखि आइतबार, नोभेम्बर १ सम्म नेपालमा पर्न सक्ने अनुमान गरिएको छ। यस अवधिमा देशका विभिन्न स्थानमा वर्षा हुनुका साथै अधिकतम र न्यूनतम तापक्रममा समेत गिरावट आउन सक्ने विभागले जनाएको छ।
कृषि र पर्यटन क्षेत्रमा असर पर्न सक्ने

धान काट्ने तथा भित्र्याउने समय र हिमाली क्षेत्रमा पदयात्राका लागि अनुकूल मानिने मौसम भएकाले यस प्रणालीले कृषि तथा पर्यटन क्षेत्रमा असर पार्न सक्ने चिन्ता व्यक्त गरिएको छ। भारी वर्षाका कारण केही क्षेत्रमा जनजीवन प्रभावित हुन सक्ने तथा उच्च हिमाली क्षेत्रमा भारी हिमपात, अत्यधिक चिसो र हिमपहिरोको जोखिम बढ्न सक्ने मौसमविद्हरूले औँल्याएका छन्।
पोखरेलले सन् २०१४ अक्टोबर १४ मा अन्नपूर्ण क्षेत्रमा आएको विनाशकारी हिमआँधीसँग अहिलेको मौसमी अवस्थाको केही समानता रहेको बताएका छन्। उक्त घटनामा ४३ जनाले ज्यान गुमाएका थिए। चक्रवातसँग सम्बन्धित न्यून चापीय प्रणाली नेपाल नजिकिएर माथिल्लो वायुमण्डलको प्रणालीसँग अन्तरक्रिया गरेमा भारी वर्षा तथा हिमपातको सम्भावना अझ बढ्न सक्ने उनको भनाइ छ।
विभागले मौसमी अवस्थाको अनिश्चिततालाई ध्यानमा राख्दै सम्बन्धित निकाय, कृषक, पर्यटन व्यवसायी तथा सर्वसाधारणलाई पूर्वतयारी अपनाउन आग्रह गरेको छ। विशेषगरी हिमाली क्षेत्रमा यात्रा गर्नेहरूले पछिल्लो मौसम पूर्वानुमान र आधिकारिक सूचनाको जानकारी लिएर मात्रै यात्रा योजना बनाउनुपर्नेछ।
यो खबर पढेर तपाईंलाई कस्तो महसुस भयो?
१ प्रतिक्रिया






प्रतिक्रिया