मुख्य कुरा
- त्रिवि सभाले आव २०८३/८४ का लागि ३० अर्ब ८७ करोड रुपैयाँको बजेट तथा नीति कार्यक्रम पारित गरेको छ।
- सभाले ९५ हजार ५४० विद्यार्थी समेटिएको ६४औँ ग्रेसलिस्ट स्वीकृत गरेको छ।
- ग्रेसलिस्टमा व्यवस्थापन संकायका ४३ हजार १४२ विद्यार्थी सबैभन्दा बढी छन्।
- स्नातक तहका ७२ हजार ४०४ र स्नातकोत्तर तहका २२ हजार ५३३ विद्यार्थी ग्रेसलिस्टमा छन्।
- बैठकले पुँजीगत खर्च र त्रिवि पुनरावेदन आयोगका नियुक्तिहरू पनि अनुमोदन गरेको छ।
काठमाडौं, २२ असोज। त्रिभुवन विश्वविद्यालय (त्रिवि) सभाले आर्थिक वर्ष २०८३/८४ का लागि ३० अर्ब ८७ करोड रुपैयाँको बजेट तथा नीति कार्यक्रम पारित गरेको छ। बिहीबार बसेको त्रिवि सभाको बैठकले ६४औँ ग्रेसलिस्टसमेत स्वीकृत गरेको छ।
शिक्षा तथा खेलकुद मन्त्री एवं त्रिभुवन विश्वविद्यालयका सहकुलपति सस्मित पोखरेलको अध्यक्षतामा त्रिभुवन स्मृति भवनमा बसेको सभाको बैठकले बजेट र नीति कार्यक्रम पारित गर्नुका साथै चालु आर्थिक वर्षको साउन १ देखि असोज २१ गतेसम्म भएको पुँजीगत खर्चलाई समर्थन गरेको छ।
बैठकले त्रिवि कार्यकारी परिषद्का सदस्य तथा त्रिवि पुनरावेदन आयोगमा भएका नियुक्तिहरूलाई समेत अनुमोदन गरेको छ।
९५ हजार ५४० विद्यार्थीको ग्रेसलिस्ट पारित
ग्रेसलिस्टमा व्यवस्थापन संकायका सबैभन्दा धेरै ४३ हजार १४२ विद्यार्थी छन्।
त्रिभुवन विश्वविद्यालय
त्रिभुवन विश्वविद्यालय सभाको ६७औँ वार्षिक दिवस बैठकले २०८२ असार १ देखि २०८३ असार मसान्तसम्म ट्रान्सक्रिप्ट लिएका ९५ हजार ५४० विद्यार्थीलाई समेटिएको ६४औँ ग्रेसलिस्ट पारित गरेको हो।
ग्रेसलिस्टमा व्यवस्थापन संकायका सबैभन्दा धेरै ४३ हजार १४२ विद्यार्थी छन्। त्यस्तै शिक्षाशास्त्रमा १९ हजार ५३३, मानविकी तथा सामाजिकशास्त्रमा १५ हजार ४४१, विज्ञान तथा प्रविधिमा ६ हजार ६८८ र इन्जिनियरिङतर्फ ५ हजार १६० विद्यार्थी समावेश छन्।
कानून संकायका ३ हजार १, चिकित्साशास्त्र अध्ययन संस्थानका १ हजार ९२०, कृषि तथा पशुविज्ञान अध्ययन संस्थानका ४६३ र वनविज्ञान अध्ययन संस्थानका १९२ विद्यार्थी पनि ग्रेसलिस्टमा परेका छन्।
स्नातक तहका ७२ हजारभन्दा बढी विद्यार्थी
ग्रेसलिस्टमा समावेश विद्यार्थीमध्ये स्नातक तहका ७२ हजार ४०४ जना रहेका छन्।
त्रिभुवन विश्वविद्यालय
ग्रेसलिस्टमा समावेश विद्यार्थीमध्ये स्नातक तहका ७२ हजार ४०४ जना रहेका छन्। स्नातकोत्तर तहमा २२ हजार ५३३, एमफिलमा २५३, पीजीडीएसमा १८४ र विद्यावारिधितर्फ १६६ विद्यार्थी रहेका छन्।
त्रिवि सभाको बैठकले विश्वविद्यालयको नीति, कार्यक्रम तथा बजेटसँगै विभिन्न प्रशासनिक निर्णयसमेत अनुमोदन गरेको जनाइएको छ।






प्रतिक्रिया