मुख्य कुरा
- विराटनगर किंग्सले एनपीएल तेस्रो संस्करणका लागि धम्मिका प्रसादलाई मुख्य प्रशिक्षकको जिम्मेवारी दिएको छ।
- उनले अमेरिका, नेपाल र ओमानको बलिङ प्रशिक्षकका रूपमा काम गरिसकेका छन्।
- टोली भारतमा रणजी ट्रफी खेलेका खेलाडीसँग फ्लडलाइट अभ्यासमार्फत तयारी गरिरहेको छ।
दमक। नेपाल प्रिमियर लिग (एनपीएल) को तेस्रो संस्करणका लागि विराटनगर किंग्सले श्रीलंकाका पूर्व अन्तर्राष्ट्रिय क्रिकेटर धम्मिका प्रसादलाई मुख्य प्रशिक्षकको जिम्मेवारीमा निरन्तरता दिएको छ।
श्रीलंकाका लागि २५ टेस्ट, २४ एकदिवसीय र १४ टी–२० अन्तर्राष्ट्रिय खेलेका दायाँहाते तीव्र गतिका बलर प्रसादले यसअघि पनि विराटनगर किंग्सको प्रशिक्षण सम्हालेका थिए। उनको अन्तर्राष्ट्रिय खेल अनुभवसँगै प्रशिक्षकका रूपमा पनि लामो अनुभव रहेको छ।
प्रसादले अमेरिका राष्ट्रिय टोली, नेपाल र ओमानको बलिङ प्रशिक्षकका रूपमा काम गरिसकेका छन्। यस्तै, श्रीलंकाको लङ्का प्रिमियर लिगमा कोलम्बो किंग्स, क्यान्डी बोल्ट्स र क्यान्डी रोयल्ससँग समेत प्रशिक्षण भूमिकामा काम गरेका छन्।
विराटनगरले बलिङ प्रशिक्षण, खेलाडीको विकास तथा टोली व्यवस्थापनमा प्रसादको अनुभवलाई मूल्याङ्कन गर्दै उनलाई पुनः जिम्मेवारी दिएको जनाएको छ।
गत संस्करणमा प्लेअफमा पुग्न नसकेको निराशालाई यसपटकको प्रदर्शनमा बदल्ने प्रसादको लक्ष्य छ। उनले अघिल्लो सिजनको अनुभवबाट टोली थप बलियो बनेको बताउँदै उपाधिका लागि अन्तिम बलसम्म संघर्ष गर्ने प्रतिबद्धता जनाएका छन्।
यता विराटनगर किंग्सले एनपीएलको नयाँ सिजनका लागि तयारी तीव्र पारेको छ। टोली हाल भारतमा रणजी ट्रफी खेलेका खेलाडीहरूसँग फ्लडलाइट अभ्यास खेलमार्फत तयारी गरिरहेको छ।
विराटनगरको मार्की खेलाडीमा नेपाली राष्ट्रिय टोलीका स्टार लेगस्पिनर सन्दीप लामिछाने रहेका छन्। विदेशी खेलाडीका रूपमा श्रीलंकाका चरिथ असलंका, शुभम रन्जने लगायतलाई टोलीले अनुबन्ध गरिसकेको छ।
यसपटक प्रशिक्षक प्रसादको अनुभव र अनुभवी स्वदेशी तथा विदेशी खेलाडीको संयोजनमा विराटनगर किंग्सले एनपीएल उपाधिमा बलियो दाबेदारी प्रस्तुत गर्ने लक्ष्य राखेको छ।




प्रतिक्रिया